مشاكل لاعبي الرجاء
المشاكل ديالكم مع إدارة الفريق فكوها في مكتب الرئيس بعيدا عن الشوشرة ، راه العيان فيكم نهار سينا مع الراجا جابو شي وكيل أعمال كيتعنكر علينا، و بالتالي فيناهما هاد وكلاء الأعمال يستخلصو ليكم فلوسكم بالقانون و بلا شوهة؟؟ أكيد حتى واحد فيكم ما غادي يجاوب حيت كلهم كتجيبو وكيل أعمال كيضرب معاك لقجة و يمشي فحالو، و فبحال هاد المشاكل ما كتبغيش دخل الوكيل حيت ما ساخيش بالعمولة اللي خاصك تعطيه
المشاكل ديالكم مع الرئيس أو المدرب ممكن تفكوها بلا ما دخلو الجمهور طرفا فيها حيت الاساءة للنادي تعتبر إساءة للجمهور اللي وهب حياتو من أجل الفريق، كاين اللي تسجن بتهمة تشجيع الفريق و كاين اللي فقد العمل ديالو بسبب الفريق و كاين اللي إنقاطع عن الدراسة بسبب حبو المرضي لشي حاجة سميتها الرجاء الرياضي و كاين اللي مات فالملعب و الطرقان، و تجيو اليوم يا اصحاب السيارات الفارهة و الحسابات البنكية المنفوخة و تشوهو النادي و تحشمو بالجمهور على قبل مستحقات حتى واحد ما غادي يضيع فيها و عقودكم ضامنة لها، واش ماشي عيب و حرام و حشومة هادشي ؟؟